1 – Ene begiek Jesus ez dute ikusten,

Gorputzeko sentsuek ez dute senditzen,

Bainan duda gabe dut han dela sinesten,

Fedeak argiturik han dut ezagutzen.

 

2 – Jesusek egin zuen azken afaria

Janaritzat emanik bere haragia.

Haragi saindu hura jaten dut nik ere,

Hura janik uste dut bizi betiere.

 

3 – Gurutzefikaturik guretzat hil dena,

Lorioski pizturik zerurat igana,

Hura da Sakramendu huntan ezarria,

Hura bera lurrean gure janaria.

 

4 – Biziaren arbola guziz aipatua,

Baratze dohatsuan Jaunak landatua,

Aurkitzen da neretzat kominionea.

Nik han dut edireiten ene bizitzea.

 

5 – Izraelek jan zuen desertuan mana,

Gustu gozo guziak barnean zauzkana…

Jesusen gorputza da nere janaria,

Desertu huntan ene kontsolagarria.

 

6 – Jainkoaren mendirat igan zen Eliaz,

Sainduki bortizturik jan zuen ogiaz…

Jaten dut aldareko ogi sakratua,

Hartaz nik ardietsi uste dut zerua.

 

7 – Urerat du lehia orkatz nekatuak,

Ihiztariez eta beroz penatuak…

Hala dut desiratzen zeruko ogia.

Jauna, sosega zazu ene gutizia.

 

8 – Xoriek badituzte beren ohantzeak,

Urzo tortoilek ere nun eman umeak…

Nik zure aldaretan dut ihes-lekua,

Nik han dut edireiten ene sosegua.

 

 

1 – Nekez eta nigarrez ezinduak oro,

Zatozte ba, zatozte.

Ene baitan zaitezten azkar eta bero,

Zatozte ba zatozte.

Ogi huni baitario

Indar eta bozkario.

 

2 – Ez ote dut zuentzat ixuri odola ?

Zatozte ba, zatozte.

Maiteari maitea doakon bezala,

Zatozte ba, zatozte.

Amodioz ez bainauke,

Zuen baitan sartu arte.

 

3 – Nere Jainko-bihotzak bazauzkate orai

Guziak bat guziak.

Zauzte beti ni baitan egiazki anai,

Guziak bat guziak,

Oro zaizten zerurat hel,

Ogi biziz nik haziak.

 

 

1 – Ez da zerurako bertze biderik,

Jesusen bihotza bezalakorik.

 

2 – Bihotz hori dago beti zabalik,

Bekatorosentzat hetsi gaberik.

 

3 – Gure bihotz ahul, bihotz ttikiak,

Oro handi bitza zure graziak.

 

4 – Zer gauza ederra Jesus hartzea,

Zurekin guk, Jesus, bat egitea.

 

 

1 –  Zeruetako Jaun handia,

Eginik gure janaria,

O amodio igeria,

Gizonarentzat geiegia. (bis)

 

2 – Gozo guzien iturria

Hiltzeko gure egarria.

O Jesus, ogi bozgarria,

Zeru ta lurren iguzkia. (bis)

 

3 – Ondo gabeko itsasoa,

Zerutik jautsi zaren sua.

O amodio hain osoa,

Arimarentzat zein gozoa. (bis)

 

4 – O zerukoen zoriona,

Oraitik pizten gaitutzuna

O lurrekoen atsegina,

Gozoenetan gozoena. (bis)

 

1 – Jainko zela Jesus,

Etzagon urguluz

Lerro gorena hartuz.

Horra mutil ezdeus,

Orotaz gabetuz,

Gizoner parekatuz.

 

2 – Bere nahitara

Jautsi da gutara,

Gure gatik hila da.

Hiltzetan ondarra

Kurutzeko hura

Gaixtaginen gisara.

 

3 –  Apal egin zena

Da berriz gorena

Ezarria izana.

Jainkoak emana

Baitio izena

Orotako lehena.

 

4 – Jesusen goresle

Belaunika beite

Zeru, lur ala lurpe.

Gora deit bezate

Jaun ta Salbatzaile,

Jainko Aitari ospe !

 

1 – Betiereko bizia

Emaiten duzun Ogia,

Hor zaitugu aldarean

Apezak jautsarazia.

Noiz dukegu bihotzean

Zure hartzeko loria ?

 

2 – Hor da Golgotan bezala

Jesusen Bihotz zabala.

Hor da ere gure maitez

Ixuri duen Odola.

Fedez eta karitatez

Guziak bete gaitzala !

 

3 – Zeruko Aitak har beza

Aldarean den eskaintza !

Ezti bedi ikusirik

Seme Jaunaren gorputza

Onets dezan gain hartarik

Hemen garenen otoitza !

 

4 – Jaunari zeru-lurretan

Ospe menderen mendetan !

Gu bakotxain amodioz

Hil baitzaiku mundu huntan,

Eta geroztik lorios

Baitago Aitaren-baitan.

 

 

1 – Jauna, zu jatean,

Zutan gu bat izan :

Zorionik maitena.

Ai zer poza dudan,

Elgar maitatzean,

Gozatzera zu,  Jauna.

 

2 – Maite zaitut maite :

Nahi nuke bete

Dena zutaz mundua.

Nitan bizi zaite,

Nihaur izan arte

Dena zutaratua.

 

3 – Goazen elgarrekin

Bihotz barnez berdin,

Denen jainkoratzeko.

Dugun indar egin

Kristo izan dadin

Diren guzien Jainko.

1- Ahuspez nagozu, nere Jainkoa,

Ogia iduri, hortxet baitzira.

Zure zurea dut bihotz osoa,

Gogoz ez baitauke Zuri begira.

 

2- Ez dezaket ikus ez eta hunki,

Halere hor dela sinesten dut nik :

Jaunaren hitzari nago osoki,

Ez baita hau bezein egia denik.

 

3- Gurutzean etzen Jainkoa ezaun,

Gaur Gizona ere gorderik duzu :

Biak hor baitaude zeru-lurren Jaun,

Lapur onarekin deika nagozu.

 

4- Zaurier diotet Tomas-en hitza :

«Nere Jauna eta nere Jainkoa !»

Emadazu, otoi ! fede bat gaitza,

Pitz dakitan zure amodioa.

 

 

1 – Jesus amodioz bihotza gaindian

Zein miragari zen azken afarian

Guretzat zelarik hiltzerat abian

Gerokotz ere zen gurekin nahian.

 

2 – Apostolueri erraiten diote :

«Ni gaur saldua naiz, bihar hilen naute.

Aitaren ganako denbora zait bete :

huna orai zenbat zaituztedan maite».

 

3 – Ogia harturik mintzo da Jainkoa

«Hau da ene Gorputz gurutzerakoa».

Gero kanbiatuz orobat arnoa :

«Hau da ene Odol ixuri gogoa.»

 

4 – Ene Gorputz hau da zuen janaria

Ene Odol hau da zuen edaria.

Hartan dut finkatzen Testament berria

Zuekin neraukan bihotz-lokarria.

 

5 – Sakrifizio ta Sakramendu Saindu

Jesusek egoitza gurekin hemen du.

Gu nahiz altxatu bera da apaldu,

Oro nahi gaitu bere-gana bildu.

 

6 – Ogi eta arno itxurez iduri,

Itxuretan Jesus itzaltzen da guri ;

Izatez hargatik ez arno ez ogi :

Jesus ber-bera da Sakramendu hori.

 

7 – Mixterio huni, o kristau maitea,

Gorputzeko begiz kakarrik ez beha :

Huntako begia da guziz fedea,

Bihotz garbiak du bixta hoi hobea.

 

8 – Jesusek gu baitan delarik egoiten,

Oi zenbat grazia deraukun emaiten.

Gu ere lorios hil-eta pitz gaiten

Bera da hazitzat gutarat eraiten.

 

9 – Adoratzen zaitut, o Jesus maitea,

Aldaretik zaude orai niri beha :

Ezagutzen nauzu ni bekatorea,

Urrikal zakizkit, o Salbatzailea !

 

 

1 – Ateari jo, begira nago :

   Jesusek dio, kanpotik dio,

   Begira nago, ateari jo.

 

2 – Ni deika entzun idek dezazun.

   Gaua zoin ilun, denak zoin ilun.

   Idek dezazun ni deika entzun.

 

3 – Eginen dugu biek afari,

   Zu mintzo neri, ni mintzo zuri.

   Eginen dugu biek afari.

                                Edo

 

1 – Bihotz eta gogoz bat lehen fededunak,

Ogiaren hausteko biltzen ziren denak.

Bere mahainerat gaur deitzen gaitu Jaunak,

Piztu gaitzan Ogiak eta Berri Onak.

 

2 – Kristoz mintzo zabiltzan indar handirekin,

Haren baitan gizonak nahiz anai egin.

Fede beraz beterik goazen orai berdin,

Jainko semen bakea zabalduz joan dadin.

 

3 – Ontasunak bakotxak elgarrenak zauzkan :

Heien artean ez zen nihor beharrean.

Gure bidez laguntza Kristok eman dezan,

Barneraino bedi sar gure bihotzetan.

 

 

1 – Nahi duzue jakin nere gutizia :

Jainko onarentzat da ene min guzia.

Ene baitan nago pentsatzen

Noiz ikusiko dudan ene Jainkoa :

Ezin bertzela biziz, Haren minez noa.

 

2 – Hura dut betikotzat ene bihotzean,

Hartaz landa ez duket pausurik lurrean.

Haren gana noa lasterrez,

Harentzat dut osoki ene gogoa :

Ezin bertzela biziz, Haren minez noa.

 

3 – O mahain dohatsua, Jainko janari.

Haren Odola bera dudala edari

harentzat da izanen beti

Bihotzean dukedan amodioa :

Ezin bertzela biziz, Haren minez noa.

 

4 – Lurreko janariak, gaitza etortzean,

Uzten dire guziak, gaitza ken artean.

Zer nahi den gaitz, nik dukedan,

Jesus dut erremedio guzizkoa :

Ezin bertzela biziz, Haren minez noa.

 

1 – Oi zer ogi dut ikusten

Gure aldaretara

Zeru gorenetik jausten

Arimen bazkatzera.

 

 

2 – Jaunaren amodioa

Hemen da seinalatzen.

Oi hau da mixterioa,

Gizona Jainkoztatzen.

 

3 – Enekin bat egitea

Duzu bada bilatzen.

Zer duzu, Jesus maitea

Ene baitan aurkitzen ?

 

4 – Hau da nere zoriona.

Zenbat ontasun betan.

Salbatzaile guziz ona,

Nola zu ene baitan ?

 

5 – Jaun ona, zure egoitza

Zeronek zazu garbi ;

Bertzela zure emaitza

Oi, nola errezebi ?

 

 

1 – Zer ogi Jainkozkoa den

Gu maitez egin, Jauna.

Gaitz-ilunbeak ditzan ken,

Da bera denek jana.

 

2 – Har ogi denek eta jan :

Hau nere gorputza da.

Har, edan arno basoan,

Hau nere odola da.

 

3 – Nik eman ogi bizi hau

Jan eta dabilana

Zoin urus, ni baitan nau,

Ni goiko zoriona.

 

4 – Hau janez bizi dena dut

Hil eta nik piztuko.

Goi argiz dirdir eta xut

Da noizbait agertuko.

 

 

1 – Mirakuilu guziz miragarria :

Jesus ona zerutik jautsia,

Aldarean zeruetan bezala,

Jainko Gizon, guretzat zaudena.

 

 

2 – Sinesten dut eta sineste hortan

Izanen naiz bizian, hiltzean.

Adoratzen zaitut, O Jainko Jauna,

Miresten dut zure ontasuna.

 

3 – Hasi nahi naiz zuretzat bizitzen,

Betikotzat nitzaitzu emaiten.

Erre zazu beraz ene arima

Amodioz zuretzat, Jaun ona.

 

4 – Oi zerua, zer ontasun handia.

Jaungoikoa ene janaria.

Ene Artzain eta ene hazkurri,

Jesus ona, zein den miragarri.

 

 

1 – Hil-bezperan, ogia har eta erran zuen :

“Huna, ene gorputza da, denentzat emaiten.”

 

2 – Hil-bezperan, arnoa har eta erran zuen :

“Huna, ene odola da, denentzat ixurtzen.”

 

3 – “Urririk dut nik emaiten, zatozte ni gana,

Behartsuek janen dute,” Jaunaren errana.

 

4 – “Ogi bizi naiz ni, dio, nitan sinets azu,

Etorriko naizelarik, piztuko zira zu.”

 

5 – “Zuen salbatzaile jin naiz, ez jujatzailea,

Aita ganik heldu naizen bizi emailea.”

 

6 – Ogi bera zatikatuz, eta fede bera,

Gorputz bera dugun egin : Jaunaren biltzarra.

 

7 – Huna Jaunaren egunak : has gaiten aldatzen,

Huna Jaunaren egunak : has bihotz berritzen.

 

8 – Aldarerat hurbiltzean, beha lagunari,

Barkaturik, bakean da egiten bazkari.

 

9 – Jesusekin sofriturik, eta hilik ere,

Haren baitan gira bizi, harekin errege.

 

10 – Jaunak nere bihotzari dio : “Joan zaite,

Bozkario, libertate, bake hedatzaile.”

 

11 – “Huna hauk egun berriak, hau bizien lurra,

Onhar, ene hautetsiak, Jaunaren agurra. »

 

1 – Azken gau hartan, zinuen, Jesus, hartu ogia :

Erditik hausteak zuen itxuratzen hiltzea.

“Nehork ez daut eni kentzen, zinion zuk, bizia,

Neronek, bai, dut emaiten, salba ditzan guziak.”

 

2 – Afari egin ondoan, eman zinen opari

Kurutze Golgotakoan Aita Jaungoikoari,

Erranez : “Batasun huntan Odola da lokarri.

Munduko lau hegaletan egin hau orroitgarri.”

 

3 – Geroztik Jaunaren herri gabiltz haren manuko,

Anaier guk ogi hori dugu eskuratuko.

Hil bazen, hau dugu berri : piztua dela Kristo,

Mezak du Jauna ageri : Gauden Haren lekuko.

 

4 – Ereile moldean da jin Kreatzaile Jainkoa.

Berak du hazi onekin utzi ere gaixtoa.

Aihena txarra delarik, gure mahastikoa,

Bilduko du Jaunak hortik uzta sekulakoa.

 

5 – Jauna noiz etorriko den gaude beti aiduru,

Hartuko ote gaituen Berekin zeruz zeru.

Bere ogi, bai arnoen hazia hark bota du.

Mahaina dut jastaturen, Harekin buruz buru.

 

 

1 – Ni naiz, ni naiz biziaren ogia.

Ni hartzen nauena ez da goseturen.

Betiko bizia bere baitan baitauka,

Piztuko da nitan azken egunean.

 

2 – Huna ogi zuen maitez jautsia.

Hau jaten duena beti biziko da.

Nik eman ogia nere haragia da,

Munduaren bizitzerako emana.

 

3 – Nitan baita, hartan bainaiz ere ni,

Nitaratzen dena nitaz biziko da.

Hauxe da zerutik jautsia den ogia :

Egon nitan, egon nadin zuen baitan.

 

 

1 – Besta saindu huni

Gaiten bozik junta :

Denen sustagarri,

Elgarrekin kanta.

Gaiten bihotz berri,

Jauna jautsi baita

Dugun gorets eta maita.

 

2 – Ogi Kristotua,

Fede hazkurria,

Jainkora mundua

Piztuz goi-argia.

Haiza bekatua,

Denak bozkaria

Izan denen iguzkia.

 

3 – Ogi Kristotua,

Bihotzen indarra,

Zeruko zerua,

Zorion bakarra,

Bakera mundua,

Jendeak batera

Denak beude zuri beira.

 

 

1 – Sakramendurik handiena,

Jesusek berak dionez,

Jainko bat berekin duena,

Gurekin bizi beharrez.

 

2 – Jesusek hil-aintzin egina

Aldarean da berritzen,

Apezak hitzak erran-eta

Ogia Gorputz itzultzen.

 

3 – Dugun bada izan lehia

Ogi hortarik jateko,

Jainko biziak eskainia

Gaitz ororen sendatzeko.

 

4 – Ogi saindu horren indarrez

Garbi dagola gogoa :

Ikusiren dut egun batez

Gorderik daukan Jainkoa.

 

 

1 – Jainkoaren Bildots amultsua

Gure bekatuek odolztua.

 

Otoi, har gaitzatzu, plazer baduzu. (bis)

 

2 – Golgotan bezala hortxet zaude,

Amodioz hila gure orde.

 

3 – Odol xortaño bat ixuririk,

Ken hoben guziak gu-baitarik.

 

4 – Azkarki zaitugu, Jesus, maite :

Gu-baitan betikotz finka zaite.

 

5 – Jesus, gure maitez hil baitzare,

Izan maitatua betiere.

 

 

1 – Jesus handia hor goibeldua,

Fedeaz zaitut hortxet ikusten.

Maitatzen zaitut eta goresten

Aldare hortan, Jaun amultsua.

 

2 – Zerutikako Ogi bizia,

Gizon flakoen altxagarria,

Senda nezazu, azkar nezazu

Ukan dezadan sarri loria.

 

3 – Gurekin zaude, Jesus, lurrean,

Bainan ondikotz molde gordean.

Noiz zaitut bada nik ikusiko

Zaren bezala zeru gainean ?

Orai eta menderen mendetan.(2)

 

1 – Jainko Jauna ostia saindu huntan

Estalia gure fagoretan,

Bihotz umil batez dugun adora,

Egiazki maita hura bera.

 

2 – Jesus, guri emaiteko bizia,

Egin zare gure janaria.

Haz gaitzazu denak zure dohainez,

Eta lagun zeruko fagorez.

1 – Jauna, nitan bizi zaite, nihau Jainkoz izan arte.

Ixilean bizi gaiten, zu eta ni bat egiten.

 

2 – Jesus Jauna bere aintzan agertuko zaikunean :

Xutik gare altxatuko, dena argi, dena Jainko.

 

3 – Gure azken egunean, har gu ere zure aintzan.

Egun hartan, zu den dena gure baitan izan, Jauna.

 

 

1 – Ixil ixila zabiltza lur huntan,

denetan emanez bizia

zabalduz grazia,

bai eta zure bihotza.

 

2 – Ai ! Zer eskerrak guk zuri gain hartan

Zu baitan guziak ikusiz

Barnetik miretsiz

Zoin gutan zinen zu ari.

 

3 – Denek zer esker-kantuak ! zer poza zer aintza !

Dirdiran ikusiz,

Zabalik miretsiz

Lur huntan erein fruituak.

 

4 – Ai ! Zer bihotzen asea ! argian,

Lorian, begiez ikusiz,

betikotz miretsiz,

Jesusen begitartea.

 

5 – Tanpez jausten ikusiz Goiko mundua,

Fededunak, denak, pitz :

altxa burua.

Kristo xutik miretsiz, altxa burua.

 

6 – Behakoak betiko xuka ditela,

Bihotz gogoz hartzeko

argi zabala :

Zorionez beteko argi zabala.

 

7 – Zu zaituzte zeruan

denek iguzki.Gure baitan Jaun izan

gaurtik osoki :

Jainkoz gaiten han

 

1 – Aintza zuri hil eta hobiratua. Amen.

Aintza zuri hobitik piztu zirena. Amen.

 

2 – Aintza zuri zerurat igan zirena. Amen.

Aintza zuri ospean sartu zirena. Amen.

 

3 – Aintza zuri betikotz bizi zirena. Amen.

Aintza zuri berriz etorriko zira. Amen.

 

 

1 – Zuk emanik dut bizia.

Bizi huntako argia. Alleluia !

 

2 – Zuk emanik dut fedea,

Bihotz barneko bakea, Alleluia !

 

3 – Zuk emanik dut ogia,

Ogi zerutik jautsia, alleluia !

 

4 – Zu ganik dut maitasuna,

Zure bihotzak emana, Alleluia !

 

5 – Zu ganik dut zoriona

Nitan baitzaude, zu Jauna, Alleluia !

 

1 – Lauda zagun misterio handia,

Jainko Jauna ostian estalia.

Zuek, aingeruek, zeruko gortea,

Adora zazue gure Erregea, gure Erregea.

 

2 – Jainko Gizon gure Salbatzailea,

Mundu, zeru, guzien Egilea,

Jauts zaite zerutik gure laguntzerat,

Gure amultsuki benedikatzerat, benedikatzerat.